Delfine in Sicht

Hoi zeme

Zerst die allerbeste news. Gester simer im Klassezimmer ghocked und den rueft d`Sohe (Koreanerin) uf einisch hei lueged doet usse sind d`Delfine. mir sind natuerlich all grad uf de Balkon use und mir hends fast nid choene glaube es isch en gruppe delfine ah eusem Strand entlang gschwumme und no relativ noech. isch so cool gsi wend die gseh hesch wies ihri guemp gmacht hend. herrlich

also und jetzt no zum reste sit em letschte mail.
dur das das mer jo am ANZAC Wucheendi es Wuchebillet postet hend simer die letscht Wuche immer unterwegs gsi noch de Schul. Am Zischtig simer is Kino, am Mittwuch simer is IMAX go Delfine und Wale de Film in 3D go luege. Isch no guet gsi. Und am Donnschtig bin i eusi Unterkunft go buche, wenn mini Familie den chunt. Wer doch au scho wieder oebis erledigt. Am fritig bin i den eifach froh gsi han i wieder emol choene deheime bliebe, will es nimmt eim scho mit wenn mer noch de schul immer furt got und den nur um die 7e stunde schlofe chan.

am samschtig han i zerscht emol bis am 10ni gschlofe und den hets gheisse ab die post uf d`ferry will in sydney het d`andrea kunz uf mich gwartet. hei da isch doch au luschtig gsi. i han jo facebook und doet chasch fruende ahneh und den mit dene chatte und email schribe. jo und den han i usegfunde das d`andrea au im facebook isch und han si als mini fruendin gno. und den het si irgendwie vo miner site usegfunde das ih in australie bin und den schribt si emol. jo si seg jetzt in neuseeland und chunt aber fuer 4teg uf sydney. jo das het fuer mich natuerlich grad gheisse das mer oebis choend zeme mache wenn si ziit hend. mir hend den au en mega coole samschtig nomitag gha. hend zeme de turm vo de harbour bridge bestige und hend dussicht vo doet gnosse und hend eifach unendlich vill gschnederet. het richtig guet do.

Am sunntig han i am 11i d`Katrin und d`Juliana ah de Warfh troffe. Mir hend zeme de Manly science Walk gmacht. Er isch 10km lang und goet de strend entland. isch mega schoen gsi. es isch nid so heiss gsi aber d`sunne het glich gschunne. jo isch mega gmuetlich gsi und hesch all so chlini strendli enddeckt wod vorher no nie gseh hesch. traumhaft

jo und das wer den au scho wieder mis wucheendi gsi und die neuste news vo de delfine.

liebs gruessli
margot