News us Manly

Hallo zeme

Es git jo scho wieder recht vill zverzelle.
also am letschte mentig und zischtig hemer Mock Exam gha. da isch en test durchlauf vonere alte Pruefig das mer gseht wo mer oebe stoht. finds chli doof das mer da scho noch 4wuche hend. jajo. bin no erstund gsi. 3teil vo 5 teils han i bestande und die andere zwoi han i nid bestande. bin ganz zfriede gsi mit mir. will mir hend jo no 8wuche lenger zums lerne.

Am mittwuch noch de schul sind i und d`Juliana i d`Digeridoo lektion gange. mir sind nur 5persone gsi, wa vo vorteil gsi isch, das de lehrer sich guet uf eus het choene konzentriere. isch mega luschtig gsi. aber es isch gar nid so eifach wie mer denkt. also en ton bring mer schnell emol use. aber wenn mer wuerklich chli spiele wet mue mer scho recht dehinder und das lerne. mol luege evtl. versuch is den i de schwiz mit em mami ihrem digeridoo vilicht bring is jo anne. es isch ganz anders wie trompete spiele. und vorallem soet mer dur d`nase luft hole das mer de ton nid underbreche mue. aber da isch verdammt schwer. mol luege vilicht schaff is jo den.
isch emel mega intressant gsi chli zerfahre wie mer das eigentli spiele soet.

Am donschtig isch euse highlight vo de Wuche gsi. Noch de schul simer uf sydney is kino. wa meined ihr wa mer sind go luege? i glaub das erroted ihr nid. in sydney isch im moment s`german film festival. si zeiged nid nur deutschi filme sondern au en schwizer film. juhui, da het fuer eus gheisse das isch es muess, de muemer gseh. es isch de film `die herbstzeitlosen` gsi. hei isch das luschtig gsi, normal muend mir jo die deutsche untertitel lese das mers verstoend aber da mol sind d`untertitel in english gsi, da isch so oebis vo komisch. aber luschtig. und den isch de film jo nid in hochduetsch gsi sondern in schwizerduetsch. also mir hend eus wuerklich fuer 1.5h wie i de schwiz gfuehlt. und den mit all dene essware. z.b roesti, den merkt mer wie mer es paar sache scho vermisst. jetzt hemer usegfunde das in sydney es schwizer restaurant isch jetzt goemer evtl. da wucheendi emol go luege oebs so oebis wie roesti hend. hend da wucheendi jo ziit, will mer am fritig kei schul hend will ANZAC isch, da isch en fiertig do in australie. jo es het richtig guet do de schwizer film zgseh.

da wucheendi han i nie choene usschlofe. am samschtig am morge han i d`hiromi scho zum 2te mol in sydney troffe. da isch en japanerin wo i z`perth kenne glernt han. jo isch lessig jetzt isch si scho 2te mol in sydney gsi fuer es wucheendi. jo den simer zeme go zmittag esse und nochher hemer no japanischi foeteli gmacht, also so en art passfoeteli aber du chasch remlli mache unds dekoriere isch mega cool und luschtig gsi. nochher hemer d`katrin troffe und sind no oebis zeme go trinke bevor d`hiromi den richtig hei isch und mir sind den uf souvenir jagt. aber es isch nochli frueh gsi fuer mich zum souvenier poste. han mer no en mega cooli aboriginal tesche postet. de rest post ih den mol no spoeter. am obe han i eigentli frueh is bett welle, aber den han i ahfo harry potter luege mit em barry (homestay father) und jo am 10ni han i den gfunde i mue jetzt is bett, de film wird no stunde go. den die hend no meh werbige wie mir i de schwiz hend da isch verruckt.

und den isch au scho sunntig gsi und i han muesse am 6i ufstoh. will d`katrin, d`juliana und i sind uf de noegscht schultrip gange. da mol simer in suede vo sydney.
leider isch s`wetter nid so guet gsi, dorum hemer am erste ussichts punkt eigentli nid wuerklich oebis gseh. de noegscht stop hemer bim buddistische tempel gmacht. es isch de groesst in australie. isch mega beihdruecklich gsi. nochher simer wieter uf kiama oder so ehnlich wos es blowhole ah de kueste het. da isch es loch imene felse und wenn d`welle gnueg gross sind detsched die ah felse und dur das loch chunt den wie en springbrunne en wasserspringbrunne ue. hei i weiss au nid wie i das beschribe soell. eigentli hemer den doet welle zmittag esse, wills aber so gregnet het simer den wieter gfahre in regewald. bis mer doet gsi sind het den wieder ufghoert mit regne und mir hend zmittag gsese, bevor mer de regewald marsch gmacht hend. isch en mega schoene regewald gsi. het mer mega guet gfalle. uf em heiweg hemer den no en stop gmacht bime andere wasserfall wo 81meter tief isch. richtig beihdruecklich, leider het nid de ganz ufeme foti platz gha. ;-)

gester noch de schul simer no go tennis spiele. isch au ganz luschtig gsi vorallem will mir so oebis wo nid im griff gha haned, aber da isch glaub au grad luschtig gsi.

ajo s`wetter isch immer noni besser. es regnet immer no. :-(

jo das wers glaub wieder emol fuer de moment.

liebi gruess use australie
margot