3. Teil Reisebericht (in der Wueste)

6. Merz
So vo huet ah simer i de wuesti richtig alice spring unterwegs.
huet am morge simer mit de sunne und de fluege ufgwacht. da heisst um die 6i. da isch mega nervend gsi, zum zmorge esse, immer sind die choge fluege cho und sind um dis gsicht umegschwiert. so ih jedem shop hemer nocheme fluegenext usschau ghalte bis mer eis gfunde hend. sind den ih de noegschte teg froh gsi hemer das gha. obwohl mer vo dem tag ah immer fruener ufgstande sind das mer euses zmorge hend choene gnuesse.
Euse erst stop isch gsi in Gwalia, da isch es verlassnigs alts mine-arbeiter dorf. isch no intressant gsi zgseh i wie chline huesli die glebt hend. das dorf isch 100johr alt. i bin nid sicher oeb immer no luet doet lebed. die andere stop sind nur gsi zum us s`wc go oder oebis ztrinke poste. de rest simer immer gfahre. am obe hemer wieder underem sterne himmel gschlofe. huet hemer es feuer choene mache, isch no gmuetlich gsi und um die 6i hemer ahfo choche. so mer hend eigentli immer den gesse wens scho dunkel gsi isch. huet is ahgnehmer gsi zum schlofe nid ganz so heiss. i bin immer mit de jess (vo amerika) uf s`wc und i han au immer nebe ihre gschlofe isch luschtig gsi. mir sind chli partner gsi. befor mer is bett sind hemer no ciao sepp gspielt.

7. march
huet simmer am 4.30 am morge ufgstande. so mir hend s`zmorge im dunkle gesse aber da isch immer no besser wie mit de fluege. werend eusere fahrt zu eusem erste stopp hemer es paar kamel gseh. i chan nid verstoh wie die ih dere hitz lebe choend. um die 9ni am morge simer amene ort ahcho wo mer fuer 5dollar hend choene en duschi neh. hei isch das schoen gsi z`dusche, vorallem fuer mini hoor, hei sind die fettig gsi. und au eusi wassertanks hemer wieder nochegfuehlt. so hemer wieder gnueg wasser gha.
am nomitag simer zu giles wetter station gange. die lueged doet was fuer wetter so isch. isch aber nid so intressant gsi wills eus nid direkt zeigt hend wies es mached.
jo und den isch wieder fahre ahgseit gsi und bush camp again.

8. merz
huet hemer d`wuesti verloh und sind is northern territorium cho. huet simer in en schlucht glofe im berg olga. und mir hend s`erst mol de ayers rock vo wietem choene gseh. um die 1ne am nomitag simer scho bi eusem camp ahcho, wo mer hend choene dusche und chli relaxe bis am 5i den simer ufbruche richtig ayers rock wo mer de sunne untergang gseh hend. isch aber nid so speziell gsi. hei isch das luschtig gsi, d`japaner hend all champagner gha und so. mer chas au uebertriebe.befor mer is bett sind simer no i d`bar gange isch aber nid wuerklich oebis glofe.
huet hemer ih dem camp gschlofe aber au wieder underem sterne himmel.

9.merz
tagwach wieder am 4.30. huet hemer de sunne ufgange vor em ayers rock gseh und sind um de ayers rock umeglofe. noch de 8tne is aber recht heiss worde, will mer alles i de sunne hend muesse laufe.
also mini meinig zum ayers rock. uf de bilder gseht er immer vill besser us. und vorallem roeter. es isch en schoene marsch gsi um de ayers rock ume aber choentisch au umene andere felse laufe. also i wuerd nid egstra fuer de ayers rock uf alice spring fluege. also die wo de ayers rock nid gsend verpassed nid wuerklich oebis. i bin um de felse mit de maureen (vo duetschland) und em kaj use de schwiz glofe. isch so luschtig gsi, mir hend immer im english gredet und de kaj isch eifach so en schnoerri. aber so isch euse marsch chli schneller verbi gange. noch em marsch simer no is aboriginal center wo mer en churze film gseh hend. nochher hets wieder gheisse fahre fuer oebe 3h und den simer ih eusem noegste camp ahcho wos relaxe gheisse het, mir sind an pool und hend karte gspielt. und den simer go dusche und hend kartoffelstock gmacht. huet isch so luschtig gsi, mir sind oebe no 5te gsi wo bis am 12i ufbliebe sind vo eusere erste gruppe. hends so luschtig gha aber den hemer gseit jezt muemer wuerklich is bett will es isch wieder tagwach gsi am 4.30. ah dem tag isch die letscht nacht gsi underem sternehimmel. i vermiss es chli,es isch so friedlich underem sternehimmel zschlofe, hesch dini rueh und i weiss au nid es isch eifach guet.

10. merz
Huet isch de letscht tag ahgseit gsi befor mer in alice spring ahcho sind. am morge simer dur de king`s canion glofe. zerscht hemer oebe muesse 500stege tritt uelaufe. hei da isch jo en guete start gsi. wa no besser gsi isch, mir hend vorher no uf s`wc welle aber im dame wc isch en schlange gsi juhui. so mir sind den zu de manne gange und hend zerscht alles abtscheged.
noch dem marsch hets gheisse ab die post richtig alice spring. i glaub es sind all froh gsi in alice spring ahzcho. im backpacker ahcho, isch luschtig gsi ih mim ruum isch en schwizer in scho gsi, so mir hend zeme d`woesch gmacht und wo mer retour cho sind sind no 2meh schwizerinne doet gsi. so die nacht han i mit schwizerinne gschlofe. het guet do wieder emol in schwizer duetsch zrede.
uf die 8ti het sich mini gruppe nomol troffe zum zeme znacht esse. isch no luschtig gsi. vorallem sind nur die juengere cho so mir hend richtig de friede gha ohni die alte moetzeler. am 10ni bin i aber scho wieder retour is backpacker will i so mued gsi bin und am noegschte tag hets wieder tagwach gheisse am 8ti zum zmorge esse und mir hend bis am 10ni muesse uschecke. nochher bin i mit de eint schwizerin is doerfli gange. noch de 1ne bin i den wieder im backpacker gsi und han no dis und jenes erledigt befor i am 3.30 richtig flughafe bin uf darwin.
hei isch de flughafe chli noch 10min hesch ihchecked und alles erledig. am flughafe han i no 2japanerinne nomol troffe wo au uf em glich trip vo perth gsi sind, isch luschtig gsi. ajo mit em gepeck isch keis problem gsi das i 2hand gepeck gha han.
wo i in darwin ahcho bin, han i de shuttelbus is backpacker gno und den han i mis gepeck fuer de noegscht tag parat gmacht han en duschi gno und bin go penne.
ajo in darwin isch im moment regeziit so es isch mega druekend warm gsi.